Këtë politikë antishqiptare, propaganda, diplomacia dhe politika kolonialiste serbomadhe po e zhvillon furishëm dhe, në mënyrë agresive, për shkak se, tanimë, e ka shumë të qartë faktin se, me rënien e kryekështjellës së kolonizuar-Kosovës, së shpejti, nga merimanga e sundimit kolonial serb, do të shthuren edhe territoret e tjera etnike, të populluara me shqiptarët autoktonë, siç janë Presheva, Bujanoci dhe Medvegja.

Po, Kosova, Shqipëria dhe shqiptarët, as Amerika e Bill Klintonit, e Xhorxh W. Bushit dhe e Presidentit aktual Barak OBAMA, as Bashkimi Evropian (BE) e as NATO-ja nuk janë fajtorë, pse të gjithë kryetarët e serbive dhe jugosllavive të derisotme mbretërore, kolonialiste, fashiste, socialiste, komuniste dhe “demokratike” së bashku me Kishën Ortodokse Serbe dhe me Akademinë e Shkencave dhe të Arteve Serbe, në vazhdimësinë historike (1912-2010) e kanë gënjyer dhe e kanë mashtruar popullin serb dhe vetëvetën, ashtu sikurse sot, që janë duke genjyer dhe mashtruar Boris Tadiqi (kryetari aktual i Serbisë) dhe Vuk Jeremiqi (ministër i Jashtëm i Serbisë se “Kosova është djepi, zemra, shpirti, territori i Serbisë”!

Kjo gënjeshtër, ky manipulim dhe ky vetmashtrim i qarqeve shtetërore politike, diplomatike, juridike dhe ushtarake; i elitave akademike shkencore dhe i politikës së kakofonisë dhe të simfonisë së Kishës Ortodokse Serbe, në asnjë formë nuk përbajnë bazamentin historiko-juridik dhe politik shkencor se “Kosova është provincë e Serbisë”, sepse kryekëput mbështetet në rrenën e krijuar vetëmashtruese më se 100-vjeçare(1912-2010), të ilustruar me mite, me përralla dhe me thashetheme gojore të popave të ndryshëm serbë dhe të Vuk Karaxhiqit etj.